Sortida a Rebenac dab lo 5 aus : lo Collègi en excursion

Lo diluns 18 de mai, los escolans de la classa de cinquau deu Collègi Calandreta de Pau que hasón ua sortida geologica suus sites de Revenac e de Bètharram. Aqueth ciutadanòts que partín tà la descobèrta deu camin de l’aiga e qu’ne podón estudiar los efèits sus la natura, au mei pròche de la tèrra.

            Hòrt deus son engatjament en la pedagogia activa, lo collègi qu’auhereish hèra regularament taus escolans projectes  « suu terrenh » entà valorar un tribalh de recerca, d’observacion, mes tanben entà ahiscar l’implicacion de l’escolan qui s’arretròba alavetz au còr d’ua desmarcha d’aprentissatge de qui e vad actor.

            En l’encastre deu programa de Sciéncias e Vita de la Tèrra, Los collegians que partín aqueste còp, questionaris en man, tà descobrir d’on arribava l’aiga bevedèra de Pau.

            Per la matiada, qu’estón arrecebuts per l’equipa de l’estacion de captatge de las aigas de Revenac e que podón atau descobrir lo ròtle e lo foncionar de l’estructura, observar tots los sistèmis de susvelhança e descobrir lo trueitotest.

            Aquera sortida qu’èra estada preparada audavant, en classa, mercés a l’intervencion deu sénher Rasse, conselhèr en desvelopament esportiu teritoriau au Comitat Departementau d’Espeleologia deus Pirenèus Atlantics. Equipats de cascs d’espeleologia, los aprenedís geològs que’s son arretrobats entà visitar la tuta de l’Ueilh deu Néez, situada au ras de l’estacion.

            Quaus elements e hèn hrèita entà la formacion d’ua tuta ? Qué çò qu’ei lo calcari ? Quin lo hicar en evidéncia ? Quaus enjòcs arrepresenta l’espeleologia ? Que son las questions a las quaus los collegians e podón respóner en aquera matiada.

Après un estanquet pantauleta ensorelhat, lo programa deu vrespe que viengó completar l’observacion scientifica en auherir la soa part de haderia en visitar las tutas granas de Bètharram. Que son quasi tres quilometres qu’an atau parcorruts los collegians ; purmèr en la partida superiora, rica de secrecions naturaus qui auhereishen un espectacle on l’imaginari e hè reclam a la sciéncia, abans de s’en.honsar mei pregond au còr de la tèrra. L’equipada que baishè a quasi ueitanta metres de pregondor, aquiu on ua immensa halha naturau e testimònia deu tribalh de l’aiga.

 

            Ua auta intervencion deu mossur Rass au collègi que viengó completar la desmarcha e auherir un perlongament au projecte per ua seança consacrada en particular aus tumahús, sol mammifèr vivant en las tutas.

            Financiada en partida peu Conselh Generau deus Pirenèus Atlantics, aquera sortida suu terrenh deu programa hèra complet, que seduisí vedederament los collegians qui endossèn los vestits de geològs per un dia.