Visita deu camp de Gurs

Dimèrcs 5 d’octobre de 2016 qu’estó organizada ua sortida pedagogica au camp de Gurs, a costat d’Auloron-Senta-Maria (64), entà illustrar la partida deu programa d’Istòria de 3au qui pertòca la Dusau Guèrra mondiau e notadament la situacion de França devath lo regime de Vichy.

La mira de la sortida qu’èra de balhar ua auta dimension au programa d’Istòria en s’emparar d’un lòc de memòria situat a proximitat deu Collègi. Lo lòc qu’estó en efèit un camp d’internament administratiu de 1939 a 1945. Republicans espanhòus, « indesirables » (qu’ei a díser personas internadas pr’amor d’aver opinions diferentas), judius e autes que i estón atau internats, dens condicions de vita vertadèrament maishantas. Tà entertiéner lo sovièr d’aqueste moment màger de la nosta istòria, bastiments qu’estón donc tornats apitar tà perméter de realizar dens quaus condicions que vivón las personas alavetz embarradas.

 

La sortida qu’a vertadèrament agradat aus mainats pr’amor, de l’ua part, la persona qui hasó la visita qu’a sabut incarnar ua emocion partatjada, e, de l’auta part, la reconstitucion deu lòc, quitament si ne torna pas préner sonque ua partida de çò qui existiva, que permet de mei plan transméter l’ambient qui podèva animar aqueste camp d’internament e har un reclam (indirècte pr’amor lo contèxte n’ei pas lo medish) dab çò qui’s passa uei lo dia per exemple a Calais.