Hestenau Latino American

Las classas de 4au e 3au qu'anèn a Biarritz lo 27 de seteme taus 25 ans deu Hestenau de cinema e cultura Latino-American, qui hicava en davant l'America centrau.

Qu'anèn véder « Historias del canal », un filme sus l'istòria deu canal de Panama au cinema de la Gara deu mieidia. Aqueth long metratge que's compausa de cinc corts metratges, qui relatan cadun, au truvèrs de l'espiar de cinc realizators, cinc periòdes claus entre 1913 e 2013. « Historias del canal » que'ns conta la vita de monde dont la vita vitanta estó pertocada per ua de las mei granas proessas tecnicas deu monde. Aqueth filme qu'estó hèra apreciat peus escolans.

Que visitèn tanben ua exposicion sus l'art engatjat « Matta » : representà's lo monde ». Roberto Matta en persona que'us hè descobrir l'univèrs familiau au truvèrs de òbras deu son pair e deus sons dus miei-hrairs, qui traduseishen un hòrt engatjament artistic. L'exposicion qu'èra participativa e los collegians qu'estón invitats a har la lor representacion deu monde. Tad aquò, qu'avèvan a disposicion papèr, futres, cisèus, pèga. Un còp la lor produccion acabada, que la devèvan péner sus ua grana paret negra, com vertadèras òbras d'art.

Après un repaish pres au miei deu villatge gormand, los collegians que's passegèn hens lo Casino en cèrcas d'informacions suus diferents artisanats presents. Qu'interrogèn personas en espanhòu sus l'origina deus lors produits e que demandèn las recetas deus plats los mei atalentaires.

La lor virada « biarròta » que s'acabè per ua passejada sus la plaja.