Atletisme

La sortida de fin d'an

Dimèrcs 29 de junh, tots los escolans qui avèvan participat a un vrèspe d'Unss qu'èran convidats a la sortida de fin d'an auherida per l'associacion Esportiv'òc. 

Qu'an passat lo vrèspe dens ua bula en har fotbòl. Qu'èra hèra arridolent e tot lo monde qu'a plan profieitat ! 

Març e abriu

Lo periòde de Març e abriu que marca la debuta de l’atletisme peus licenciats d’Esportiv’òc. Los minimes motivats, tròp chic numerós ne pòden pas presentar ua equipa, donc sonque los benjamins que son inscriuts augan.

Dejà 3 encontres qu’avòn lòc, las autas que seràn a la rentrada. L’equipa deu Collègi que’s pòt deja felicitar d’estar purmèra au relai !!

Abriu qu’estó tanben lo mes on èra descalada la sortida esquí dab d’espòrt partajat. Cinc collegians acompanhats per Regine qu’anèn a la Pierre St Martin per partatjar un dia deus berois dab d’autes escolans handicapats. 

L'atlétisma qu'a comencat lo 16 de març. 

5 dias son prevists dinc a la fin de l'an, lo collègi qu'ei representat per ua equipa de benjamins qui son, peu moment, lo mei rapides au relai deu district!! 

Felicitacions, contunham!!

 


Lo 3 de heurèr: aquathlon a Nay

Robin e Gaston qu'an participat au lor purmèr aquatlon ! Qu'avèvan de har 200 m de natacion e 1000 m de corruda. Los benjamins que s'i son plan escaduts en acabar a la dusau plaça (Robin) e la quatau plaça (Gaston). 


Lo 13 de genèr: campionats d'academia d'esqui, Cauteret

Louise, Romain, Esteban e Eric qu'èran convidats a partir de 6ò30 deu matin lo 13 de genèr per representar lo Collègi aus campionats academics d'esquí a Cauteret. Devath un beròi sorelh, que s'i escadón de plan en acabar a la 13au plaça sus 21 participants.


Lo 20 de genèr : basquet taus benjamins

Lo 20 de genèr, los benjamins qu'avèvan rendetz-vos au licèu St Dominique tà har basquet. 

A despieit d'estar chic numerós, que hasón mantuas partidas dab arsec e bona humor. 

Ailàs Djina que's hasó mau de cavilhar, mes los sons dus camarades Martin e Gabin que hasón pròva de galanteria per l'acompanhar .

Felicitacions a tots per aqueste bon vrèspe!!  


Lo 16 de deceme: corruda academica a Bregeirac

Lo 09 de deceme : espòrts partatjats

Lo dimèrcs 09 de deceme,  quauques collegians que participèn au purmèr dia d'espòrt partatjat de l'an. 

L'espòrt partatjat qu'ei lo parrat de har espòrt dab d'autes escolans qui sufreishen de handicap.

Aqueste dimèrcs, l'espòrt causit qu'èra lo basquet fauteuilh. 

Tots los collegians qu'èran deseparats per mesclar'se dab d'autes e har partidas. 

Ua experiençia navèra, un espòrt hèra diferent deu Basquet classic, qui'us a plan agradat d'ensajar. 

 

Lo 02 de deceme : corruda departamentau a Pau

Lo 02 de deceme, los 9 collegians qualificats qu'anèn a l'estadi deu Hameau, representar lo Collègi per la tradicionau corruda departamentau. 

 

Louise e Marie que comencèn lo vrèspe, dens un grop de 126 minimas, qu'acabèn respectivament a la 56au e 87au plaça. 

Djina e Amandina que partín en seguida dab 263 autas benjaminas, qu'acabèn  a la 115au e a la 118au plaça.

 

Mei tard dens lo vrèspe, que son los benjamins qui partín, Gaston, Antoine e Martin Noutary . Qu'acabèn a la 10au, 118au e a la 168au plaça sus 274 collegians. 

 

Enfin, los grans , Romain e Eric que s'aborrín au miei deus 146 minimas mainats, qu'acabèn a la 56au e a la 65au plaça. 

 

Enqüèra ua hèra bona annada peus collegians de Calandreta ad aquesta competicion. Osca a tots!!

 

L'aventura que contunha dab la corruda academica  lo 16 de deceme a Bergerac


Lo 07 d'octobre : triathlon de Baudreix

Lo 7 d'octobre, 4 collegians qu'anèn representar lo Collègi au Triathlon de Baudreix.

L'espròva qu'èra d'encadenar 100 m de natacion (o 50 m taus benjamins) mei 3 km de bicicleta e enfin 1 km de corruda.

Gaston, Martin , Eric e Romain s'i son hèra plan escaduts!!


Lo 16 de seteme 2015 : lo dia Nelson Paillou

Lo 16 de seteme , tots los collegians qu'èran convidats tà participar au dia de l'espòrt escolar, lo dia Nelson Paillou.

Que i avèva 4 activitats perpausadas: canoe bi plaça/natacion/corruda e bicicleta/ zumba.

Mercés a ua temperatura qui s'i prestava los collegians qu'an plan profieitat de las activitats e de l'aïga.

Un hèra bon vrèspe dab un ambiant deus bons tau purmèr dimèrcs de l'annada!!