Jornalisme esportiu en espanhòu

Dens l’encastre deu projècte d'AIDIN: Activitats Inter Disciplinàrias e Inter Nivèus, espanhòu e espòrt qu’avem hèit mantuas activitats en mesclar las duas matèrias.

Qu’avem apitat un lexic de vocabulari esportiu en occitan, espanhòu e francés, qu’avem seguit la copa deu monde de rugbi, qu'avem apitat diaporama de presentacion d'espòrt en espanhòu puish qu’avem cercat esportius espanhòus deu parçan dens las mantuas equipas paulinas per pòder'us encontrar.

Augan lo Vilhèra Hand Ball qu’arcuelh 4 jogadors professionaus ispanofònes : Victor Donoso, 25 ans, chileno e 3 argentinos : Lucas Moscariello, 25 ans, Franco Gavidia, 24 ans e Leonardo Querin 33 ans. Aitor Etxaburu l'entrenaire e Luis Do Rego lo director esportiu son tanben espanhòus

Lo divés 27 de noveme que son tots vienguts au Collègi Calandreta entà ns'encontrar.

Qu’avem avut ua discutida en espanhòu dab eths e que'us avem pausat mantuas questions tà poder har coneishença.

Victor , numerò 77 o 7, que jòga au hand desempuish los sons 17 ans qu'ei lateral esquèra. Lucas Moscariello, numerò 5 qu'ei pivòt desempuish los sons 18 ans. Franco numerò 2 o 4 , qu'ei lateral esquèra, qu'a començat aus sons 12 ans e Leonardo Querin, numerò 8 o 9 o 10, lo darrèr dret, que hè au hand desempuish los sons 10 ans.

Aitor Etxaburu l'entrenador qu'ei un ancian jogador professionau.

Aquestes jogadors qu'an causit lo hand desempuish la lor mainadèra per'mor qu'ei un espòrt de velocitat, de contacte, hèra tecnic. Que nòtan lo hand qu'ei un espòrt dab hèra d 'emocions, en efèit la partida n'ei pas jamei acabada, que cau demorar atentiu dinc a la fin, pensar, cercar solucions : « qu'ei un jòc de matematicas ».

Que s'entrainan 4 còps 2òras/setmanas e 2òras de musculacion, 2 còps /setmanas. Que son atentius a la lor alimentacion.

Qu'an causit la França, per'mor lo contracte perpausat qu'èra interessant, lo nivèu qu'ei deus mei bons d'Euròpa, e lo minjar qu'ei deus bons !!

Lo mei dur dens l'adaptacion en França qu'estó la lenga, lo nivèu deu jòc e sustot d'estar luenh de la lor familha e de'us véder sonque 2 setmanas per an …

Qu'avèm après hèra de causas, la discutida qu'èra plan interessanta. Los jogadors qu' an acceptat la nosta invitacion per'mor de poder parlar espanhòu, que'us agrada d'escambiar dens lo lor lenga mairau.

Que ns'an dit que lo noste nivèu d'espanhòu qu'èra deus bons e qu'aqueste moment qu'estó un vertadèr plaser tad eths.

Que tornan au Collègi lo 17 de deceme tà partatjar un vrèspe de Hand dab tots los collegians.