Deus ieroglif dinc au tag, escríver ger e uei

Lo noste purmèr tribalh qu’estó d’inventoriar çò qui volèvam tribalhar e d’ac classificar per tèma: Purmèras escrituras (ideogramas, escritura cuneifòrma, iéroglifes...), escrituras luenhècas (araba, chinesa, russa ...), pratica de l’escritura (Escríver un mot dab totas las escrituras ancianas o actuaus, talhèrs d’escritura, fresca grana dab tots los mots de la piramida deus fondaments de la classa. Escríver un libe dab ua navèra escritura inventada, dab mantuas escrituras ; Pintrar enluminuras, calligramas ; escríver ua canta dab escritura de la musica o collègi calandreta en tag) ; invencion d’ua escritura ;descobèrta d’autas fòrmas d’escrituras (braille, mòrse, còdes secrets, rebús, panèus de senhalizacion, escritura cinematografica, musicau, matematica, escritura de l’istòria en lo paisatge, mots com fòrma d’art (representar quauqu’arren dab mots per exemple : o los mots com « engana uelh » o lo tribalh de Magritte dab lo mot e l’imatge, tags, grafitís, land art. descobrir aventuras ad arron de l’escritura (1821l'Indian Cherokee Sequoyah qu’inventa un alfabet destinat tau son pople, Gutemberg, jornalisma, lei sus la libertat de la premsa...)

Que decidim de tractar un punt après l’aute, e de completar lo tribalh en classa per recercas a casa. Cada sedença que s’acabava per un bilanç e pista tà la seguenta.

Que comencèm per las escrituras ancianas :

I°) Escritura e preistòria

Que seré long d’ac presentar tot, resumim en díser qu’avóm dret a presentacions teatraus de l’invencion de l’escritura, d’apòrt de documents qui podóm tribalhar en classa suus ideogramas e escritura cuneifòrma après recercas sus libes o sus internet,

Que ns’essagèm a arreproduíser los signes utilizats peus òmis preistorics en utilizar sonque mestiors trobadas en la natura. Que descobrim matèiras naturaus tà pintrar : lo pishaulhèit qui balha un jaune, l’argèla un marron iranjat, lo carbon un negre, mossa qui non balha pas nada color mes qui escureish las autas, petitas frutas rojas qui colòra d’un  marron drin jaune, la gèira qui balha vert, huelhas d’erable, vriolet, flor  marron, vert e vriolet. Dab grilhat e papèr pegat qu’apitèm un relièu tau pintrar com los òmis preistorics.

II°) Escritura e Antiquitat

Quauques uns d’entre nosautes que n’s presentèm alavetz pictogramas e escritura cuneifòma. Los pictogramas com ajòu deus rebús : chat +pot = Chapeau. Qu’ essagèm d’escarnir la debuta de l’escritura dab argèla e calams de bambós.­ Cadun que creè ua òbra qui’s posquia expausar e qui sia en rapòrt dab la debuta de l’escritura: ua òbra dessenhada au husenh sus pèira, un calculi sus un nombre de crabas comptadas, ua representacion d’òmis preistorics masèdan lo huec, ideogramas inventats dab la lor significacion.

Que passèm alavetz a las escrituras luenhècas conscients qui èram deu temps qui passava. Cadun que cerquè un trocicòt d’escritura en un alfabet diferent deu noste, que peguèm tots los trocicòts entà har ua aficha, qu’avóm bonjour en russe, ua frasa en escritura araba entà díser qu’aimi la bicicleta, lo mot collègi en corean, mots de japonés evocant sustot elements e sasons, la frasa « qu’aprèni lo chinés » en chinés, mots e letras de japonés, tatouatges dab escrituras tibetanas e ebraïcas, mots d’islandés e lo mot amor en japonés Aqueras escrituras d’alfabets diferents que las copièm entà realizar panèus tà la mustra.

Que’ns demorava chic de temps entà las escrituras diferentas mes que ns’i escadèm drin totun. Que cerquèm ideas tà ua aficha dab causidas de panèus de senhalizacion rotèra destornats e puish escrituras diferentas com lo mòrse, lo Braille Que las recapresentèm sus ua aficha panèu. Que hasomtags en partir de las ideas de panèus aportadas.

E qu’acabèm per l’organizacion de la mustra.N’anèm pas, luenh se’n cau, dinc au cap de las recercas qui avèvam previstas, mes qu’aprengóm ua pièla de causas  ... dab plasèr e gaujor, e que deisham tàd autes un purmèr tribalh si ac vòlen perseguir.